صديقي الفيلسوف

كان لي صديق فيلسوف .....
بأقوال الحكماء شغوف....
سألته يوما.............
-ايه يا حج النظام .......شكلها غمقت علي الاخر
- احنا بس اللي مستعجلين .....مشكلتنا اننا فاكرين.....ان الدنيا زي افلا م السيما.....في الاخر هيجي البوليس يمسك محمود المليجي الشرير ....وبعدين البطل هيتجوز البطلة ....والخير ينتصر.......ابدا الدنيا في الحقيقة غير كده خالص ابسط من كده.....في ارض الواقع الشر غالبا هو اللي بينتصر .......
شوف التاريخ ...قاعدين بنبص علي اوروبا وامريكا ونقارن نفسنا بيهم .......اوروبا عاشت ايام سودا لحد ما بقت زي ما احنا شايفين.....الشر كان فيها صاحب اليد العليا...يعني بدأوا بحضارة الاغريق.....اتنغنغ اليونانيين لوحدهم....وسحلوا الباقي .....وبعدين الرومان ...عملوا امبراطورية ....وسحلوا باقي اوروبا.....وبعدين الكنيسة مسكت اوروبا كلها ....وسحلت كله.....من ميتين سنة وشوية.....من ايام الثورة الفرنسية بدأوا ينضفوا.....وحتي عشان يوصلوا للي هما فيه دلوقتي....عدوا علي اتنين حرب عالمية مات فيها ملايين. مجاعات وكساد اقتصادي.....العالم دي اتبهدلت عشان توصل للي هما فيه دلوقتي ......عدوا علي انظمة اقتصادية وسياسية ....اشي شيوعية ....اشي رأسمالية ....الشر عندهم انتصر كتير ....عشان العيشة اللي هما فيها تيجي دلوقتي .......الناس دي عدا عليها ايام سودة....وانحدار....عشان يوصلوا للنور.....
شوف امريكا.....من ايام ايزابيلا وفرناندو....ملكي قشتالة وليون....لما بعتوا ...كولومبوس يروح يجيب طريق تاني للهند ....راح جاب امريكا في ايده و رجع....راحوا الاوروبيين لامريكا.ومش أي اوروبيين لا دول ركش اوروبا و لصوصها المطاريد يعني...قعدوا 200 سنة يدبحوا في الهنود الحمر...وبعدين قعدوا يجي خمسين سنة يدبحوا في بعض في حرب اهلية بين الشمال و الجنوب. وعنصرية وبيض وسود بيتخانقوا ....وبعدين اتنين حرب عالمية .....و اتنين قنبلة ذرية علي هيروشما ونجازاكي......سواد  يعني ...والشر فضل يتنيل ينتصر في امريكا .....لحد ما بدأوا يسرقوا العقول من كل حتة في الدنيا.....خدوا علماء من المانيا بعد هزيمة هتلر....وعلماء من الهند وباكستان والصين .....وعمال من امريكا الجنوبية والصين وافريقيا....حتي بلادنا خدوا انضف عقول عندنا......وسابوا لينا الركش.......ده اللي قصدي عليه كل بلاد العالم ليهم فترات طويلة تعدي عليهم من السواد .....وفترات قليلة...من الحضارة والنضافة....
-يعني انت شايف ان احنا قدامنا كتير عشان ننضف ونبقي متحضرين......
-لأ يا صديقي انت مش فاهم .....احنا عدينا بفترة النضافة  والحضارة خلاص......
ايام الفراعنة......
احنا قدامنا الايام السودة بس

عايزين ميه!!!!!!!

في قلب ميدان الجيزة .........وكأني في يوم الحشر السيارات لا تتحرك اقود عربتي بسرعة صفر  كيلو في الساعه فكرت في ترك السياره والسير الي المعادي........ قد يكون هذا اسرع........تخيلت سرب من السلاحف المائية في بركة وحل.....و...

.. نظرت اليه كان يقف علي جانب الطريق محاولا ايقاف تاكسي مستندا علي عكازه بظهر محني.......العربات تمر امامه بمعدل كل خمس دقائق عربة ولا احد يريد ايصاله الكل يرفض .......جاء دوري في الوقوف امامه ترجلت من سيارتي وتركتها في نصف الطريق –عايز تروح فين يا والدي

-كورنيش المعادي يا ابني

- طب تعالي يا والدي انا رايح هناك

ادخلته السيارة وجلست علي مقعدي......

 يا ألهي......... كم يبلغ هذا الرجل من العمر....ان عدد التجعيدات في وجهه بعدد النجوم كل انحنائه تميل علي الاخري صانعه وجها اقرب الي تماثيل محمود مختار...... وجها مصريا خالصا

 ينبعث من عينيه المغطيتين بجفنين عملاقين وحاجبين مزينين بالابيض حالة سلام داخلي يبعث في .....وفي الدنيا بأسرها الطمأنينة

-حضرتك رايح فين

-انا رايح البنك عشان اصرف المعاش .......بنزل يوم واحد في الشهر من البيت اصلي قاعد لوحدي ...اروح اصرف المعاش وارجع ....انا كنت شغال في هيئة المية والصرف الصحي.......طلعت معاش سنة ...هو اسم الكريم ايه؟

-محمد

-عاشت الاسامي .....انا اسمي زكي وليم ......هو الدنيا زحمة قوي ليه كده النهاردة يا.......قلتلي اسمك ايه؟

-سواقين المترو عاملين اضراب .....عشان كده الدنيا اتقفلت

-عشنا وشفنا ....مصر يحصل فيها اضراب........من ايام الملك ما شفتش اضراب والله يا ابني ....هو النهارده ايه في ايام ربنا؟ا

- الاربع 14-11

-يااااااااااااه سنة54 اليوم ده عبد الناصر شال محمد نجيب وحبسه في بيت خرابة كده في المرج......عبد الناصر كان كويس ....بس انا زعلت منه لما عمل كده في الريس نجيب.........انت عارف يا.......انت قلتلي اسمك ايه؟

-محمد

-عارف ......انا عايش من زمان قوي شفت الملك فؤاد وبعده فاروق ....وبعدين نجيب وناصر والسادات .....الله يرحمهم كلهم.......وبعدين مبارك........فترة مبارك كلها كنت قاعد في البيت بعد المعاش بعد لما خالتك ام جون ماتت......وجون سافر كندا......وبقيت قاعد لوحدي ما بنزلش بستني مكالمة التليفون من جون وولاده ماري ومارك.......بيتصلوا بيا كل يوم......كل يوم كنت بقعد في البلكونة بشوف الدنيا بتتغير والوجوه بتتغير........كل يوم بيبقي اوحش ...والفاظ الناس اوحش .....والفقر اكتر.....:.كتير كنت بشوف ست بتدور في الزبالة تطلع اكل .....وتاكله..........الغريب ان مبارك مشي .....والست لسه بتيجي عشان تاكل من الزبالة.

-عارف يا احمد......بما اني خبير في الصرف الصحي......كنت بقول لابني جون في التليفون لما كان بيسألني عن الثورة ومصر.....احنا كنا عاملين زي راجل عنده اسهال .....ومزنوق علي الاخر .....وبقاله كتير بيلف علي حتة يفك فيها زنقته ......لحد ما ربنا كرمه بحمام ....راح داخل ...وهوب راح فكك زنقته اللي كانت تقيله قوي......وبعدين مد ايده يفتح الشطاف.......مالقاش ميه........بقي متعاص وفي حوسه.......فك زنقته بس مش عارف ينضف........محتاجين ننضف يا ابني........

انزلت الرجل عند البنك وقبلت رأسه.......واسرعت في الذهاب الي عملي ......وانا امعن التفكير في كلامه.......عايزين ميه يا ريس ....عايزين ميه  

عم حسين البني

عم حسين البني ....بجسد فارع الطول عريض كأنه شاحنة ....يقف داخل كشكه في مدينة الخصوص عم حسين كان يسمي منذ سبع سنوات بحسين الحرامي .....لكن بعد زيارته لبيت الله الحرام لخامس مرة قرر انه يتوب عن السرقة -سافر اربع مرات من قبل للحج بفيزة حرامي ....يعني كان بيروح يقلب الحجاج اما المرة الخامسة قرر انها تكون للتوبة عن السرقة......بعد العودة من الحج قرر عم حسين -....ايمانا منه بان الشباب من حقه ان يؤمن انه يطير ....وانه يستطيع ان يلمس السماء بعد ما سمع مرة اغنية اجنبية ترجمهاله الاستاذ علي حلاوة مدرس الانجليزي بتاع حمودة ابنه-.......قرر عم حسين ان يمنح كل رجل وشاب في محيطه القدرة علي الطيران .....فأصبح تاجر حشيش واصبح اسمه حسين البني .......
مدينة الخصوص حي عشوائي ناتج من نتائج حركة الانفتاح المباركة .....تجد في الخصوص كل انواع المباني من اول عشش الصفيح وحتي الابراج الشاهقة.....سكان المكان اغلبهم من النازحين للقاهرة العامرة من كل مكان في ارض المحروسة.....كي تصل الي مدينة الخصوص عليك ان تركب عربة نص نقل مخصصة لنقل الدواب بما فيهم البشر-ما البشر بيدبوا برضه-....من المرج الي الخصوص........كنت اعمل في مستشفي الجمعية الشرعة اكبر مستشفي في الخصوص ....كانت المستشفي صاحبة موقع استراتيجي علي المصرف علي طول.......كشك عم حسين البني بجانب المستشفي .......ذهبت للكشك وقلت....في سجاير كليوباترا يا حج
لا يا استاذ احنا ما بنبعش سجاير في حشيش بس..
ترنحعت خطوة الي الخلف وفتحت فاهي مشدوها- يعني فتحت بقي زي العبيط-
-انت غريب عن المنطقة يا استاذ
-ايوة يا معلم انا دكتور وبشتغل بقالي يومين في مستشفي الجمعية
-دكتور...بسم الله ماشاء الله....واد يا حمودة ...-خرج من داخل الكشك شاب في ال١٦ او اكثر من عمره -........روح لعمك شديد هات علبة كليوباترا بوكس وحاجة ساقعة بسرعة عشان الدكتور
هممت بوضع يدي في جيبي لاخراج النقود بادرني المعلم
-عيب يادكتور انت ضيفنا والله ما يحصل ابدا
-امال يامعلم الكشك فاضي يعني مفيش بضاعة لا بسكوت ولا شاي ولا سجاير  والتلاجة دي فاضية كمان
-بص يا دكتور ....هو اسم الكريم ايه
-محمد
-بص يا دكتور محمد ان ما بحبش اشارك حد في رزقه انا سايب جيراني ياكلوا عيش ما ينفعش ازاحمهم في رزقهم انا ببيع حشيش والتلاجة دي فيها كودا......ما ينفعش كمان ابيع سكر وزيت وشاي امال جيراني اللي حواليا يبيعوا ايه......التخصص يا دكتور هو سر النجاح
- وعلي كده الشرطة سايباك عادي كده
- يا دكتور هنا مفيش شرطة ومفيش حكومة احنا بنعمل كل حاجة بنفسنا طرق، مجاري، كهربا ، حل مشاكل....... بنمسك الحرامية ونعاقبهم ولو حصلت قضية قتل بنمسك اللي قتل ونشوف اهل القتيل عايزين ايه ديه ولا تار........احنا هنا بره المحروسة لا حد عايز يعرفنا ولا احنا عايزين نعرف حد منهم
-اتفضل يادكتور......ناولني حمودة علبة السجائر ....وزجاجة الكولا ..تناولتهم شاكرا ثم نظرت الي عم حسين
-يدوم الواجب ياحج
-يدوم عزك يا دكتور
-قولي يا حج حسين اشمعنا الحشيش و ليه مش الهيروين ....مع انه بيكسب اكتر
-لا يا دكتور اعوذ بالله الهوروين ده سم بعيد عنك وانا مسمش اهل حتتي ابدا.....انا محرم دخوله الخصوص كلها واللي بيفكر يدخله الخصوص بعلقه من رجليه علي بابها...عارف يا دكتور....الواد موريس ابن عم تاضرس كان عايز يفتح محل بيرة وخمرة وكده.....الرجاله راحت تشتكي لعم تاضرس ....مسك ابنه اداله قلمين قدام الناس وقاله انا مش قلتلك ماتفتحش الموضوع ده تاني... اللي عايز حاجة بيجيبها من برة لكن يتفتح محل خمرة والعياذ بالله عشان  ينجس الحتة كلها.....
بعد مرور ٨ سنوات وفي العام ٢٠١٠ اضطرتني الظروف ان اذهب الي الخصوص........
 في اول المدينة وجدت قسم للشرطة -الحكومة دخلت الخصوص يا حج حسين-......
ذهبت الي  عم حسين البني فلم اجده ولم اجد الكشك ووجدت محل كبير للخمور مكتوب عليه مشروبات موريس تاضرس.....وعند سؤالي عن عم حسين عرفت انه مات وابنه حمودة اصبح اسمه حمودة الابيض حيث انه اصبح اكبر تاجر هيروين في القليوبية.....كل هذا حدث بعد موت عم حسين وعم تاضرس .....وبعد دخول قسم الشرطة الخصوص!!!!!!!!